前4日係花蓮明明好好天，黎到台北就開始落雨了。今日訓到自然醒，起身已經中午時間，今次係台北完全無計劃行程，諗住到時想去邊就去邊，可以輕鬆啲~
見今日自己一個人，不如去shopping啦，朋友提議到五分埔行下，見未去過就坐捷運行下先。五分埔位於松山站及後山埤站中間，所以兩個站其中一個出都好方便，松山站就4號出口，後山埤站就1號出口。
行左10分鐘左右就到五分埔商圈~
哩度同香港長沙灣批發中心差唔多，同樣地唔係全部鋪頭都有零售，有啲只接受批發訂購，所以有時睇啱想買都未必買到呢! 唔知係咪平日同埋落雨既關係，條街真係好少人，行得好舒服，唔似香港要左迫右迫。行左2、3個鐘都無乜好買，決定到師大夜市再行下，反而買到野，真係唔駛錢個人唔安樂 XD
第六日，今日就感受一下當地人生活，陪朋友行下街市、超市買餸。
午餐就係附近食，印象中第一次係台灣食西餐，因為多數都會選擇到夜市或者食火鍋、燒肉等，好少會選擇西餐，點左牛扒、德國豬腳、雞肉沙律、南瓜湯，感覺味道偏淡了點，都係濃味適合我多啲 XD
本想到板橋「435藝文特區」行下，點知突然落大雨又帶住小朋友，唯有改變行程到商場~
晚上，就約左朋友去”花麻辣”打邊爐，難得撞啱一齊到台灣旅行，所以約埋好好一聚~
第七日，台灣朋友突然中午返來，原來請左半日假陪我去玩，真係好感動呀!!
二話不說，即刻換好衫，食個簡單午餐，就揸車出發!
駛到十分車站附近，睇到有好多天燈係空中呢~~
十分瀑布係熱門旅遊點，所以平日泊車都有點困難 >< 睇睇地圖先，由遊客中心出發，路線只得一條，兜個大圈，最後回到起點~
入到十分瀑布公園，有3個位置可以觀賞瀑布，哩個係第一個位置~
之後落樓梯會行到另一個位置，從下方睇瀑布~
最後再行返上樓梯，從上方望落黎，3個唔同位置~
瀑布隔離有幾間小食店，行到攰可以休息下，買下小食同飲品~
由於路線只得一條，所以大家都會向同一方向走，先穿過”觀瀑吊橋”~
再穿過”四廣潭吊橋”回到起點~
上車後，晚上就到基隆夜市掃街~
朋友推介基隆出名小食”鐤邊趖”，就試試哩間有六十幾年歷史既”邢記鐤邊趖”先，材料有肉羹、蝦仁羹、魷魚絲、蝦米、香菇、筍、高麗菜、金針、芹菜等等~
再試”豬腳原汁專家”既豬腳~
仲食埋雞翅包飯，一口香腸都好食呀!
最後食埋”三兄弟”甜品，叫左招牌”包心+芋圓+粉圓+豆花”，唔知點解好鍾意食台灣芋圓，所以每次去台灣必食~
返到板橋區，朋友就順便帶我遊一遊哩區其中一個出名景點”新月橋”。
都幾熱鬧喎，有一家大細又有情侶係度散步~
行到橋中間有條透明天空步道，但晚上黑麻麻乜都睇唔到~
行左陣都返去了，今晚要PACK行李，明天回港啦~