出發日期：25/3/2017-26/3/2017
船公司：TURBOJET
酒店：澳門新新酒店 (地址: 澳門司打口14號至16號)
行程如下：
DAY 1: 香港–>澳門(外港)->贏到粥->巴黎人->酒店
DAY2: 酒店->Isaac Toast & Coffee->大三巴->華一麵館->望廈山->二龍喉公園->東望洋燈塔->張記粥麵->澳門(外港)->香港難得好友邀請快閃澳門，雖然無特別景點想去，但為左食好野，再去都無所謂啦!
今次主要HEA遊，黎到澳門已經係晚餐時間，一出碼頭就坐巴士到媽閣廟附近既火鍋店”贏到粥”。上次試食過後就好掛住個卜卜蜆同WASABI手撕雞，可惜禽流感既關係，無新鮮雞入口，所以今次無緣食手撕雞，唯有等下次再食啦 ><
除左卜卜蜆，手打墨魚滑同蝦滑都好食呀! 提提大家黎之前最好先打電話訂枱，因為真係好FULL，WALK-IN可能要等好耐，同埋手撕雞都要預定架~~訂好曬黎到唔怕無位無得食啦!
食飽就到對面坐巴士到巴黎人影夜景，今次都係第一次黎，澳門酒店開得太快，唔黎一排已經開左好幾間新酒店了~~
老實講，個夜景影出黎真係幾靚，就幻想一下自己去左巴黎先啦 XD
係巴黎人酒店快行一圈參觀下先，感覺上同其他新酒店差不多，有名店有賭場，都係吸引唔到我~
雨越黎越大，最後坐的士返酒店。今晚入住既酒店係新馬路附近，房間唔會太細又乾淨整齊，價錢合理，都值得考慮一下。
第二日訓醒就出發去食食食啦，第一站去左韓國人氣店Isaac Toast & Coffee，叫左安格斯牛吐司、鮮蝦堡吐司，榛子朱古力、CAPPUCCINO，牛肉好JUICY，醬汁都好好味，飲品又有拉花，視覺同味覺都好滿足呀~~
每次路經大三巴總會影返張相留個紀念~
第二站去左位於筷子基既”華一麵館”，叫左肥牛北海道奶香芝士火鍋配煎麵、豚肉韓式泡菜火鍋配粟米麵、厚蝦多士。鐘意食芝士既朋友應該會鐘意哩個火鍋，配埋個脆卜卜既煎麵都幾特別，但粟米麵就遜色左啲，食落同普通既麵差唔多，唔係好食得出有粟米味，至於蝦多士，就比較鍾意個WASABI醬幾好味。
之後到附近既望廈山，山上有個公園再行上啲會有個炮台，食咁多野都要行下消化下 XD
再坐松山纜車，車站就係二龍喉公園入口處，纜車來回都係葡幣$3! 好平呀! 雖然5分鐘都唔駛就到，但可以慳返啲力氣行上山~~
再往山上行會到東望洋燈塔，哩度係其中一個影婚紗照熱點。
為左早點返香港，個肚未餓又要食晚餐啦~~今次到位於三盞燈既”張記粥麵”，去到餐廳大廚都未返工呢 XD 阿姐好好叫我地坐底睇下叫乜餸先，大家都唔太餓，就揀左個波士頓龍蝦雞煲同埋米通鯪魚球，雞煲會送埋生菜同蜆，賣相都唔錯呀~~食落仲越食越好味! 打埋邊爐仲正!!3百幾蚊就可以食到龍蝦，唔算太貴吧? 所以黎澳門有機會要去試下呀~~
雖然澳門唔係一個低消費既旅程，但勝在近香港又方便，就算即日來回都無問題，放假黎HEA下食下美食都幾好呀!