聽日朝早會係Aquagrace Chapel參加婚禮，由那霸市到教堂都有好一段距離，所以決定今晚入住殘波岬酒店，教堂係酒店附近，咁就唔駛一早咁頻撲了。執好簡單行李，行李箱就寄存係那霸酒店，聽晚再返黎入住。
酒店早餐選擇唔多，但餐廳員工服務很好，驚我地唔識煮麵，就急不及待出手幫忙~~
早餐雖然簡單，但要讚下個豬軟骨麵真係幾好食~讚~
朋友見到隔離日本夫婦食了兩份納豆，好奇問我有無勇氣試食，見未試過食納豆，不妨一試，但當打開納豆果刻，聞到其氣味已有點後悔，放入口內真如朋友所講的”似臭腳味” 哈哈哈哈 XD 雖然知道納豆係一種相當健康既食品，但我真係覺得試一次就夠了~~~不過，大家都可以一試~~可能會因此而愛上呢~
出發到波上宮啦，由酒店步行去大約20分鐘，沿途都係天陰陰，似乎想落雨~
波上宮興建係海邊斷崖上，係沖繩地位最高既神社，歷史已超過700年，參拜人數亦係沖繩首位呢~
沿住左邊樓梯向上行，參拜前先到”手水舍”洗洗手，遊客可參照旁邊指示牌洗手~
旁邊寫著的應該係犯太歲年齡吧? XD
再到拜殿，旁邊都有參拜方法，香油錢金額不限，據說日語中5元的發音與[緣]同音，所以有使用5元硬幣既習俗作為香油錢~
參拜完後再係院內散散步，買下守護符，還可以抽下籤，當做一種占卜。
卸神籤分為六種：大吉、吉、中吉、小吉、末吉、凶。一場黎到就抽下籤，睇下運氣如何。自發性地放入100YEN，然後隨意抽一張。
據說抽到[凶]時，為左把惡運留係院內，會將神籤綁係院內先離開。雖然我地抽到小吉同末吉，但唔知幾時再有機會返黎答謝，所以將神籤綁係院內離開了。
沿住神社旁右邊馬路直走，會走到波之上海灘，那霸市內唯一既海灘~
有行車天橋擋著，景觀唔算太好，但想游水而又唔想去太遠，哩度都係一個好選擇。
圍住海邊行，開始落起細雨，但好彩雨好快就停了。
跟住就坐的士到美國村會合其他朋友，3人坐的士既價錢跟坐巴士差不多，所以決定坐的士。 車程約30分鐘，起錶由550YEN，全程收費為3,240YEN~
美國村(AMERICAN VILLAGE)有餐廳、服飾、生活雜貨、藥妝店等店鋪，最為人熟識就係大型摩天輪 (Carnival Park Mihama)。晚上摩天輪既景色都好靚呢，不過仲未有機會親身見過 ><
見朋友未到，先去AEON MALL超市逛逛，睇下有乜生果好買先~望落去唔太新鮮，所以無買到~
會合朋友後突然落起大雨，只好先吃午餐，揀左西餐廳”Island Terrace”，點了安格斯牛扒、沙律、PIZZA、炸薯條同焗飯等~
食飽後，雨都停了還出太陽!! 沖繩天氣真係變幻莫測!!又可以再周圍行下影下相買下野~
坐係海邊吹住海風嘆返杯咖啡~都好relax~~
哩間音樂盒專賣店，有超過1,500種產品，有啲仲係日本製呢! 價錢跟香港比較，真係比較便宜，可以話價廉物美! 朋友都忍唔住手買左個音樂盒返香港~~
路過見到放飲品既吹氣水泡都幾得意喎~
之後朋友揸車約40分鐘路程就到其中一個代表沖繩既景點”萬座毛”，遠遠望過去真係好似象鼻造型呢~
圍住景點兜了一圈~無敵海景同草地 XD
朋友努力航拍中，見到雪糕機就買支雪糕食下先，係沖繩好多地方都會見到雪糕售賣機，夏天可以隨時食到冰凍雪糕，真係人生一大樂事呀~~
之後再到另一景點”殘波岬”，這個景點以欣賞日落而出名。
可以行去另一邊暸望台~
開始日落了~
天上雲彩都好靚呀! 哩度太靚了，連唔多影相既朋友都主動叫影相，影完仲要不停講”痴線，堅靚囉!” 哈哈哈 XD 無論影日落定雲彩，真係好值得到此一遊，當然，天清氣朗就更好啦!!
景點門口會見到由巴士改造成既食店，主要售賣熱狗、漢堡包、雪糕同飲品，行到攰可以坐底休息下食下野~
真係好多人黎睇日落呢~
夕陽無限好，只係要離開殘波岬返酒店CHECK-IN了 :p
今晚入住既酒店，房間比那霸酒店大，雖然有點殘舊但整體感覺整潔，走出露台仲可睇到日落同燈塔~
酒店晚上會著燈寫住”ZANPA”~好有心思呀~
晚餐揀左酒店對面既”花笠食堂”，點了沖繩料理必試既海葡萄、炒苦瓜，石垣牛等，全部食物味道都好OK喎~值得一試~
之後可以到隔離”御菓子御殿”試食同買手信，而另一購物點就只有酒店地下店鋪了。見到酒店地下有沖繩特色貼紙相機，忍唔住都影左兩張~好青春呀~~N年無影過了~哈哈哈
要返房休息了，明天就係同事大日子~~唔知沖繩同香港婚禮會有乜唔同呢? 期待~期待~