7天東京近郊賞紅葉 DAY 2~雲場池~聖保羅天主教堂~舊輕井澤銀座商店街~輕井澤王子購物廣場

今日行程預計用大半日時間踩單車遊輕井澤，由於輕井澤既景點唔太集中，所以單車遊會比較方便。先到有”天鵝湖”之稱既雲場池，係輕井澤三大觀光名勝之一，亦係睇紅葉其中一個必去既人氣景點，之後會到舊輕井澤銀座商店街，最後到輕井澤王子購物廣場掃貨~

一早訓醒就到”白貓自行車”租車，地點就係APA HOTEL斜對面，可能早上9點幾太早，所以租車既人唔算多~

只得半日時間，所以租左普通單車 (每架¥500)，如大家唔想踩得太辛苦可選擇租電動單車(每架¥1,000)。租車時，店員會記錄其中一位朋友既姓名同電話，付款後，揀好單車及檢查功能無問題就可離開。玻璃窗上及枱上貼出了注意事項，大家租車時記得好好細閱~

出發前，店員會派發地圖比每組人，簡單介紹左個方向，就出發去雲場池啦~

沿途有好多人踩單車向雲場池去，所以唔怕會迷路，踩左一陣就見到雲場池指示牌了~

踩到迴旋處，地圖旁邊既路口一直踩就到目的地了，由於大多數時間都係踩在馬路上，所以大家要小心注意安全呀!

終於到了~係旁邊停泊好單車就入去啦~

門口附近既紅葉唔算多~

入到池內，有點失望 >< 因為紅葉已經落得七七八八了 。但湖景仍然好吸引，天氣好到仲可以影埋倒影!圍住池邊行左一圈，湖上有好幾隻鴨仔暢泳中，好寫意呀~

雖然紅葉落得所剩無幾，但雲場池真係好值得一遊!

繼續到下個景點，係兩邊樹旁中踩單車，感覺好悠閒舒服呢!駕駛人士亦唔會隨便響安，只會係你身邊慢駛走過~

“聖保羅天主教堂”係一個熱門既結婚場地，因為傳說係哩間教堂結婚可以得到很多人的祝福。當日去既時候，咁啱無人舉行婚禮，所以可以入內參觀~

再到對面既”CHURCH STREET”購物中心，同其他 shopping mall 唔同既地方係很多商舖都容許寵物一齊入內購物，顧客可帶埋寵物一邊散步一邊購物。

輕井澤其中一款受歡迎既手信係果醬，店舖內有過百款果醬任試唔嬲，旁邊放左餅乾可夾住果醬試食~

穿過CHURCH STREET就會黎到舊輕井澤銀座商店街，兩旁有好多手信購物店~

觀光巴士剛好經過~

其中一間店鋪售賣兒時玩具~

試食後覺得哩間既果醬都好好味~所以再買啤梨及薑味果醬做手信~

路經餐廳門口，見到棵好靚既楓樹，可惜好多紅葉已經跌曬落地了~

無意間見到條行仔~

行入去會見到”神宮寺”~

轉返出大街，有間”輕井澤寫真館”，專為顧客提供明治時代的貴族服裝，好似穿越時空帶大家回到舊時，如果有時間又想影返輯特別既相作紀念，不防考慮考慮一下~

“淺野屋”內塞滿客人，聽聞麵包好出名呢~

龍貓共和國，個人覺得貨品同香港差唔多 :p

“腸詰屋”賣火腿的連鎖店，又大排長龍，唔通真係好好食?

兜左個大圈，要還單車了~

回酒店放低手信後就到輕井澤王子購物廣場，穿過輕井澤站南面出口，在車站天橋上遠遠見到輕井澤王子滑雪場，都有唔少人滑緊雪呢~

先到味之街食晏~

都係想食魚生，所以揀左哩間日式餐廳~

見到餐牌介紹有12款以上海鮮仲有3款食法，好吸引咁，就試試~

朋友就點了個海鮮飯~

等我試試面前既三步曲，第一步”海鮮飯”，先把海膽移到一邊，試食左個海鮮飯，再將二分一既海鮮飯乘到另一隻碗內，第二步”海膽飯”，將切碎左既香菇和蓮藕倒入海鮮飯內，再加海膽一齊攪拌就變成海膽飯，記得留返三四啖海膽飯倒入留起左海鮮飯既碗內~

第三步”泡飯”，對服務員講日語”Odasi wo, kudasai”，佢就會將海帶湯倒入剩下既海鮮飯加海膽飯內變成泡飯~食到第三步已經好飽了~咁既食法都唔錯喎~

唔想去餐廳可選擇到FOOD COURT醫肚~

outlet劃分左10個區域，品牌種類繁多，時間有限既話，最好預先揀好自己想去既店舖。正中間有個大草地，小朋友同寵物可以係草地散步玩樂，行到攰都有好多地方休息，真係可以消磨成日時間。

聖誕燈飾亮燈了~行到晚上8點關門時間都唔捨得離開呢~

係outlet內既蔬果店買左提子同士多啤梨，兩款都超甜超好食!

王子outlet雖然店舖多，但戰利品成績一般，還好會到御殿場outlet掃貨，到時可再買買買，不過今晚重點係要執行李搬酒店 ><

• 7天東京近郊賞紅葉 DAY 1
• 7天東京近郊賞紅葉 DAY 3
• 7天東京近郊賞紅葉 DAY 4
• 7天東京近郊賞紅葉 DAY 5
• 7天東京近郊賞紅葉 DAY 6 & 7