今日行程主要到五六島天空步道(SKYWALK)同甘川洞文化村~
SKYWALK係2013年先開幕既新景點，步道位於高達35公尺的懸崖上，遊人可以係全長15公尺的U形玻璃步道上行走，向下望就會睇到懸崖峭壁，唔知會唔會好驚呢?而甘川洞文化村有被稱為”釜山的馬丘比丘”，因為山坡上全部都係色彩繽紛既小屋，路上也有很多藝術雕塑和壁畫，睇相已經好吸引，喜愛影相既我，最鐘意colourful既建築物，所以決定到此一遊~
先係酒店附近既餐廳食早餐，叫了紫菜卷、石鍋飯，餃子等，一早就食到超飽~
之後坐鐵路1號線到釜山站，先幫T-MONEY 咭增值，坐巴士會方便好多~
再轉乘27號巴士係五六島SKview公寓站下車，車程約40分鐘~
巴士內都好闊落~
落車後，先到Information Center攞資料，中心內已經睇到無敵大海景了~
再沿路向山上行10分鐘，遠遠已見大排長龍~
排左大半小時就可以入內，費用全免，不過要記住，每位遊人進入景點前必須套上鞋套。但不用5分鐘已經行曬成個U字彎位，向下望都唔係好驚即 XD
下一站到甘川洞文化村，旅遊書教路可以係札嘎其站坐小巴到文化村，所以先到札嘎其站午餐，行行下就走到札嘎其傳統市場，哇! 魚缸內既長腳蟹真係好大隻!由於我地決定係機張先食長腳蟹，所以今次只路過此地，同埋今日係中秋正日，有好多店鋪都關門了，顯得冷冷清清。
見到門口豬腳好吸引，就決定入內食晏。
除左常見既前菜外，仲有湯同蒸蛋，今次叫左豬腳、冷面、沙律、飯團，又是滿滿一枱既食物XD~沙律同飯團要帶手套自己MIX埋一齊食，個沙律甜甜酸酸的很開胃~豬腳都好好食，唔會有好油膩既感覺~
本想坐小巴到文化村，但行左大半小時都找不到該小巴站，所以轉坐的士到文化村，車程大約20分鐘，費用6,500WON(約港幣45蚊)，收費唔貴，所以大家趕行程既話，都可考慮坐的士到目的地。另外，會建議大家到土城站6號出口，右轉直行會比較容易搵到綠色小巴(沙下1-1、西區2、西區2-2)到文化村~
睇完地圖~主要都係圍住個山行一圈~
一入村已見到牆上有好多壁畫了~
很喜歡這條魚~影到唔捨得走 😛
再往山上行~沿途都仲有好多壁畫、餐廳同購物小店~
行到高處向下望，真係有好多彩色小屋，好特別呢~
到文化村另一重點係要會一會小王子同沙漠狐狸，可惜小狐狸已經不見踪影了，唯有同小王子一齊欣賞文化村美景啦~
走了一圈，太陽開始下山，係時候坐小巴落山了。回到札嘎其站，見到街邊有好多小食檔~
再向前走睇下有乜好食先~
行行下，原來已經行到釜山富平夜市，可惜中秋節既關係，好多店鋪都冇開呢~
左揀右揀，晚餐決定食燒肉，第一次食燒豬皮，好煙韌，但冇乜味~個人覺得試一次就夠了，都係燒肉好味啲，有OPPA 招呼我地都幾好呀 😛
回到酒店，係時候賞月了，今日係農曆八月十五，都要應一應節食下月餅同水果，第一次係外地過中秋呢!
今日係精品店買既戰利品，最喜歡既係貓貓眼罩~露營旅行最啱用!
