出發日期：14/9/2016-18/9/2016
航空公司：大韓航空
酒店：亞爾本酒店 (Arban Hotel) (@西面站) (地址：32, Jungang-daero 691beon-gil, Busanjin-gu, Busan, 47287)
行程如下：
DAY 1: 香港–>釜山金海國際機場->酒店->HOME PLUS->EMART->大賢地下商街->酒店
DAY2: 酒店->五六島天空步道(SKYWALK)->札嘎其站->甘川洞文化村->札嘎其站-> 酒店
DAY3: 酒店->南浦->太宗台->龍頭山公園->光復路->樂天百貨->酒店
DAY4: 酒店->機張->釜山大學->保稅街商圈->西面站->酒店
DAY5: 酒店->海雲台->THE BAY 101->西面站->釜山金海國際機場->香港
雖然釜山係韓國第二大城市，但好多朋友都話釜山有乜好玩呀?又冇野睇冇野玩冇野買? 去首爾仲好啦!但實情係~釜山有野睇有野買之餘，仲有好多又平又好食既美食，如豬肉湯飯、松葉蟹、海膽粥、豬腳 、燒章魚，燒鰻魚、海鮮鍋…..等等，講起而家都好想再食呀!
今次出發日期正直係中秋節，中秋節亦係韓國大節黎，會有3日(14-16/9)公眾假期，有啲食店、商鋪會放連假(包括LOTTE、EMART等大型超市)，所以計劃行程時要多加留意，以免白行一趟。
出發前指定動作~
原本凌晨兩點機，DELAY 左成個鐘先可以起飛，十級眼訓呀 >< 好彩係機上都可以訓得著~
早上7:30左右終於到左釜山，攞齊行李過關後，就坐鐵路到市中心。由於機場既兌換率偏低，所以到市中心先換錢。由機場7號出口，過左馬路轉右行大約300米 ，就會見到鐵路站。
有T-MONEY或Cashbee咭增值後就可直接入閘了，由機場站到西面站大約需時25分鐘。係車箱裏，發現左一個感應器，原來只要孕婦帶住一個鎖匙扣般的小型無線藍牙發訊器走在孕婦座附近，座旁的粉紅色燈號會著燈，提醒佔座者主動讓位，當孕婦坐底後，燈號就會關掉，對懷孕初期「未見肚」的孕婦很有幫助呢!但暫時只係得釜山至金海輕電鐵路有此感應器試用中，唔知香港幾時先會推行哩類既感應器呢?
釜山鐵路主要分4條路線，遊客多數坐既係1號線到釜山大學、西面、南浦、札嘎其等及2號線到廣安、海雲台等。
到了沙上站後再轉2號線到西面站~
今次揀左西面站既酒店，因為西面站除左係轉線站外，仲要係釜山其中一個購物區，有很多食店外，仲有地下街，有野食又有野買，唔怕悶同餓親啦!
本想睇下有冇得早啲CHECK-IN補補眠再出動，可惜最早都要2點先可以CHECK-IN，唯有先放底行李去換錢再周圍逛下~
係地鐵西面站7號出口乘電梯上來直走，就會見到左手邊一整區都是西面市場，而右手邊就會出現［西面市場］的牌子，睇到紅色圈住既牌就往左邊看，會有一條巷仔，裏面就有兩間舖頭換錢啦！港幣、美金、人仔都可以換到WON~
去旅行最鍾意逛超市~換好錢後，第一站就去HOME PLUS行下先~
一入到超市就見到有好多禮盒，如水果、人參、餅干、茶包、糖果等禮盒，最特別係有午餐肉、罐頭類、油、牙刷、洗頭水等禮盒，日常用品既禮盒都幾特別呀，又實用，唔知遲啲香港會唔會有類似既日用品禮盒呢? XD
買買下都買左半車零食離開~
再轉到對面既EMART，今次入到去就比雪櫃內既生果吸引住了!出國旅行又點少得買當地水果食呢?見到大量提子同楊桃在減價，應該係最合時既水果了吧!就買哩2樣當飯後果啦!
行下行下又買滿左成架車了，2間超市都分2層，1層係食品，另1層係日用品，要行曬都要花點時間，相比之下，EMART既貨品會比較吸引~
夠鐘可以CHECK-IN，坐的士回酒店放底戰利品先~
房間整體感覺不錯~
整理好行李後，就到附近食店醫下肚~先黎試下豬肉湯飯，所有前菜都可自助refill。湯飯到時，阿朱媽(即韓國大嬸)教我地要把韮菜混入湯飯一齊食，等我試下湯底先，清清地都幾好味，再根據個人喜好加入韮菜同盬，個味完全唔同曬~可一試~
再往前行，見到街邊有好多小食，不過食得太飽，已經食唔落了~
食飽就有啲睡意，同埋太早機既關係，個人真係好攰無心機行街，所以大家決定返去訓返個午覺先~
訓飽後再戰大賢地下商街，雖然無名牌店鋪，但有很多服裝店，精品店，仲有THE SAEM, MISSHA, IT’S SKIN, TOO COOL FOR SCHOOL, SKINFOOD等多個韓國護膚化妝品牌都可以搵到，真係可以行大半日~
血併完後已經到左晚餐時間~今晚就試食網燒章魚，叫了4人份量既燒章魚同埋五花肉蝦仁烏冬，上菜時，見到紅紅既章魚已經覺得好辣了><
章魚可以包住菜一齊食，感覺健康啲，味道唔錯，但…真係好鬼辣!!唔食得辣既我，唯有不停咁飲冰水解辣~超辣但都要食，因為真係好好食 XD
行左半日西面站都仲未行曬，要行既地方太多，只係時間唔夠~
今日既戰利品，唔算太多，個人最鐘意係LINE既飲品，不過帶返香港都幾重下=.= 明天要再買再食過!!
