年尾要清假，又見天氣不錯，就膽粗粗一個人入橋咀玩航拍。選擇橋咀嘅原因係因為一個人玩航拍好難兼顧飛行器及圖傳的實時拍攝，考慮到橋咀沒有高山或障礙物阻擋，而且風景富有特色，非常適合進行航拍。
要影到橋咀富有特色一面，當然要遷就潮退時間，查過天文台潮退時間，決定下午兩點出發入西貢，再坐船入橋咀島。
初頭天色麻麻，心諗難得一場黎到就照起飛當練習。第一次一個人飛，拿出事前準備好嘅貓紙，重複望望航拍機圖傳嘅開機次序，免得有任何差池。又點估到會被在旁觀看嘅阿叔笑我要睇貓紙，害得我一臉尷尬，唯有答佢「穩陣啲好……穩陣啲好」，然後再偷偷睇多幾眼先敢起飛。
飛飛下，天色突然好轉，陽光照射下嘅橋咀海水特別清徹。
橋咀最有特色當然係連島沙洲嘅大自然奇觀，用航拍機由高空影落去會特別靚。
黎到橋咀其實仲可以睇埋日落先走，不過因為我選擇果間街渡公司最後一班在橋咀開出嘅船係5:30PM，而且我要早啲返去準備第二朝早去塔門露營嘅嘢，最後無等日落便坐船離開。
送上小弟第一套自編自導嘅航拍片 🙂
後感︰第一次一個人去航拍，初初都帶點緊張，因為由計劃起飛地點、航導及拍攝題材都要非常講究，而且要顧及安全，不可以隨意亂飛。最後可以剪成一套很滿意的影片，頗有成功感，但自覺仍然有不少進步空間。
郊遊日期︰2015年11月
隨行資訊
航拍器材︰ DJI Phantom 2 + Hero4 silver
建議起飛點︰沙灘小碼頭
GPS接收︰非常好
難度︰ 1級 (容易)
橋咀交通︰於西貢碼頭乘坐街渡前往 (注意︰碼頭有多間街渡公司提供往橋咀服務，價錢班次時間不一)
(上述資料只供參考)
***根據香港郊野公園條例第11條，在郊野公園及特別地區操縱動力驅動的模型飛機屬違法，可被罰款2,000元及監禁三個月。航拍人士應注意安全，以免觸犯法例***
歡迎各位隨行者以文字、相片或影片，跟大家分享有關香港郊遊、遠足、攝影、航拍或露營的心得、遊記、趣事及路程規劃等等。
投稿方法：請把閣下的聯絡方法(姓名及電郵地址)、文字、相片檔案或影片(請提供影片存放連結，如youtube)電郵至follow2015atw@gmail.com
#內容版權歸作者所有，FolloMe隨我行網誌管理員則保留最終刊登及修改之權利。