東京今日落左第一場雪，亦係我東京落雪初體驗呢! 昨晚天氣報告預測會落雪，已令我有點期待，一出酒店門口即刻攞相機出黎影相同拍片，好似個大鄉理咁 😛 無計啦，係香港無落雪機會，所以睇到落雪真係會特別開心興奮，落緊雪既天氣無想像中咁凍，但長時間留係室外都會變雪條…….
影相唔係好覺落緊雪，拍短片就清楚好多了~
興奮過後，醫醫肚食野先，今日早餐會到池袋西武店8/F既美登利迴轉壽司，營業時間11點開始，但10點幾已經有人龍係門口出現了~唔想排隊亦可係店舖門外買盒裝壽司，賣相都唔錯架~
分店都有好幾間，大家可到官網查詢地址~
轉眼間已坐滿了人~
除左係輸送帶上直接攞壽司，亦可利用平板電腦自助形式落單~
每碟壽司價錢介乎¥100-¥500不等，款款壽司都好大件!好新鮮!!好好食!!! 款款都好想試，無奈食量有限，想叫多啲都食唔落了~
其中特大赤海老壽司(¥300)，隻蝦差唔多有成隻手掌咁長! 另一款黃金豪華壽司(¥500)，有金萡、海膽、魚子、金槍魚，睇個賣相已經好吸引了! 今餐食左16碟收費為¥6,274，個人覺得以食物質素黎講真係好抵食!!
食飽就開始shopping，行下百貨公司、地下街、GU、Muji、UNIQLO等~
推介大家可到藥妝鋪買麵包超人蚊貼，貼上蚊咬患處就可以止痕架啦，十分方便，對我黎講真係好work!
聽聞PANASONIC風筒超好用，行開BIC CAMERA見到特價中，就買左2個唔同型號返黎試下，吹完啲頭髮真係滑左好多!大讚呀! 但要留意唔係全部型號都適合香港用架，所以買既時候要問清楚~
晚餐就試左來自京都既炸牛排”京都勝牛”~
餐牌選擇種類唔多，牛排即點即炸，白飯可以無限添加，唔駛驚食唔飽 😛
枱上有單張教大家食牛排既6種方法，我就鍾意點炸牛排專用醬汁多啲，但試埋其他食法都無壞呀~
叫左一份特選牛定食同一份黑毛和牛定食，成為¥4,186，平時唔好食炸物既我，都覺得哩間既炸牛排唔錯，炸粉唔會太厚食落又唔會太油~
回酒店執好行李，就出發到機場酒店以便明天坐早機回港。先坐JR山手線到日暮里站，再轉京成本線(特急)到成田機場(約需個半小時)。
今晚入住成田機場旅館，酒店會有免費接駁巴士定時接載住客，第1航站係16號站牌等候，而第2航站就係32號站牌等候。
大家可到以下網址查閱酒店接駁車時間表~
http://www.apo-resthouse.com/english/acc/
房間雖有點舊，但空間夠大同埋還算整潔，反正都係逗留幾個鐘，沖好涼執好野就訓覺了~
早上出發到機場前，無聊下將行李放上大堂個行李磅上，原來已經25KG!! 怪不得咁鬼重，去東京真係好難忍手買少啲野呢…….哈哈哈
去過輕井澤、河口湖、箱根等郊區地方，都係比較鍾意河口湖，可以泡温泉，食温泉料理，睇靚景之餘，遊人亦唔多。雖然大部份景色都以富士山為主，但富士山總有點吸引力令人百看不厭，四季景色不同，真係一年去四次都得! 河口湖區仲有好多地方未夠時間遊覽，有機會一定會再黎! 輕井澤同樣地值得再遊，但箱根就未必了，因為每個景點或交通工具都擠滿了遊客，只係不停地排隊、排隊再排隊，感覺真的有點辛苦，可能真係太熱門的旅遊景點了。