得返半日時間遊輕井澤，所以選擇到星野區閑遊後，就坐長途車到河口湖去~
酒店往JR站方向走會途經巴士站，可到草津温泉、白絲瀑布等地方，可惜今次旅程時間有限，唯有計劃下次再遊吧~
走到輕井澤站南面出口，可乘搭「星野度假區免費接駁巴士」（星野エリアシャトルバス）來往星野區，全程約 20-30 分鐘，行駛時間會因應季節而有所改變，所以出發前記得去下面網址check左先，唔係就要坐公車到星野區了。
http://www.hoshino-area.jp/zh-tw/accessz
車站旁有幾棵楓樹，朋友K小姐等車期間砌左個K字出黎~又砌得幾靚喎~~
坐到總站落車就係星野區了~
沿住河邊過對面馬路往山上方向行~
會行到”輕井澤高原教堂”，係門口影左一陣相，就有新人要準備行禮，工作人員要求遊客離開以免打擾行禮過程，所以未能入內參觀~
再到附近既”石之教堂”(又稱為「內村鑑三紀念堂」)，同樣又有另一對新人行禮，所以都係無緣入內參觀，果日應該係好日子~咁多人結婚呢~
還好可走到教堂下層既展覽館參觀~
輕井澤既”星野温泉區”係屬於知名連鎖度假村事業星野集團，聽聞哩度最有名既”蜻蜓之湯”係屬於碳酸鹽泉，泡完之後皮膚會變得滑滑嫩嫩！我都好想試下呀~~
見到聖誕樹都要影下相，應下節~棵樹超高呢!
冬季先有既溜冰場~有點遠，所以無走過去望望~
食返個early lunch@村民食堂，點左味噌炸雞扒定食同炸豬扒定食，個人覺得雞扒比豬扒出色~
“榆樹街小鎮”店鋪雖然唔多，但各有特色，有食品、家品、服裝、飾物、手信店等~
仲有餐廳、甜品店、咖啡店~
12點左右，返到巴士站已大排長龍，真係要預多點時間排隊上車，不然要等多一班車呢。回程途中，突然吹起大霧，馬路上變成白濛濛一遍，能見度好低，出門時明明仲好好天，突然就被大霧包圍住，好奇怪既天氣~
返酒店攞齊行李，趕到13:55班次到東京站(約75分鐘)，再坐「中央本線特急列車」到新宿站(約15分鐘)，先到新宿站小田急旅遊服務中心買”富士箱根周遊劵”3日PASS，再搭「中央本線特急列車」到大月站(約90分鐘)~真係要用大半日時間先去到河口湖!
越黎越大霧~
係車站便利店買左支輕井澤乳酪飲~
到大月站轉「富士急行線特急列車(搭自由席)」到河口湖(約60分鐘)，趕到坐18:00班次，由頭站坐到尾站，全程18個站~
經過大約5小時，終於到河口湖了!!天黑黑又落住細雨，打電話到酒店，好彩仲有接送服務，司機叫我地係車站旁既10號車站等候~
唔駛10分鐘車程就到左今晚入住既温泉酒店”花水庭酒店”，房間很大，服務很好，還有專人送晚餐同舖榻榻米~
晚餐時間，前菜有好多款式，全部都細細碟好精緻，主菜仲有大蝦呀!服務員把食物分開幾次送上，感覺好似食極都未完，上到甜品已經超飽了，今餐無論係視覺同味覺上都好滿足!
休息左陣，換好浴衣，出發泡温泉啦~
温泉分左室外同室內(各一個池)，地方不算大，泡完還可去按摩，當然要另外比錢啦~
哩張就係富士箱根周遊劵(小田原站)3日PASS (每位¥5,650)，河口湖、御殿場、箱根大部份交通工具都可3日內任搭，十分方便! 因為手上既JR TOKYO Wide Pass可乘車到河口湖，所以明天先開始用哩張PASS，要留意一點，哩張PASS只可係新宿站或小田原站既小田急旅遊服務中心購買，其他車站係冇得出售，詳細資料可到以下連結睇到~
今晚落住細雨，希望明天會好天睇到富士山啦!!