郵輪海上體驗假期 DAY 1 “海洋航行者號”

出發日期：1/7/2016-3/7/2016

初初對郵輪既感覺係得一個字“悶”，無乜特別野玩，主要目的都只係為左賭博，但自從上年朋友邀請我參加左四日三夜高雄郵輪之旅後，就對郵輪既睇法大大改變了，甚至想一去再去。

上年乘坐的郵輪係皇家加勒比國際遊輪既“海洋航行者號”，上船後即刻心裏“哇!”左一聲，因為無諗過原來郵輪係咁大咁靚，以前曾經乘坐過雙子星號出海，同哩艘郵輪相比真係差好遠，見到艘郵輪咁靚，忍唔住要周圍參觀參觀。郵輪內有很多設施，如泳池、按摩池、溜冰場、籃球場、乒乓球場、迷你高爾夫場、緩跑徑、健身中心、戲院、賭場、圖書館、甲板衝浪、攀石等等，還有很多不同既表演及巡遊，活動應有盡有，24小時都玩唔完，餐廳方面也有很多選擇，如自助餐、西餐、中餐、日式餐、意大利餐、美式快餐、扒房、火鍋等等…..

由於上年覺得這艘郵輪太好玩了，所以今年決定帶一家人再次登上這艘郵輪遊玩，今次一行8人，其中5人都是第一次登上這艘船，大家都玩得不亦樂乎。

出發當日11:30AM左右就已經到達啟德郵輪碼頭~~

填好健康問卷後就準備排隊CHECK-IN啦~

好多人上船呢~一早就已經打蛇餅了~

CHECK-IN時，大家可選擇在船上用現金或信用咭付款，之後再影人頭相就完成了~準備上船!

由於1:00PM才可進入房間，所以我地只好到DECK11既”帆船自助餐廰”食返個晏先，提提大家，船上分別有3間餐廳係提供免費餐飲，這便是其中一間，其他的是要另外收費。

食飽飽後可以入房睇下房間了~我地8人訂了兩間雙人陽台房及一間四人陽台套房~

睇完雙人陽台房後，就睇四人陽台套房，感覺很寬敞，廁內還可浸浴呢~

見距離緊急集合演習還有一段時間，就帶大家周圍閒逛下先~~

這艘郵輪高有15層，長度310米(大約3個足球場)，而載客量有3,840人，要行曬成艘郵輪真係要花一點時間呢，首先到DECK11睇下泳池及按摩池，仲有個大型電視在戶外，可以一邊游水一邊睇電影~

再到DECK12，兒童遊戲中心，小朋友只要拿住張房咭就可以隨便擦咭玩遊戲，大人們可能要在此破費呢 XD

DECK15仲有個教堂可行禮~唔知有多少人會選擇在郵輪上行婚禮呢?

最後到DECK14，行到有點攰同太熱了，就到卡拉OK廳坐下休息下，窗邊環境唔錯，一邊無敵大海景一邊池景~

3:45PM 強制性緊急集合演習開始，所以活動必需停止，乘客必須根據房咭顯示既集合區集合。這演習主要係教大家既逃生路線及救生衣既著法，由於要點名確保所有乘客已出席，但有些乘客郤遲遲未到，天氣又炎熱，令到部份乘客表現得有點苦燥。

約一小時後，演習結束，我地又要趕到DECK5既星空酒廊排隊攞冰上溜冰既表演入場券，根據上年既經驗，知道他們是根據房咭數量來換取入場券，所以今次好快地收取8人既房咭然後換取入場券。

在郵輪上，房咭就如大家既付款咭，所有既消費都會記錄在房咭內。落船當天，賬單會放在房外，如簽賬沒問題，船公司就會直接從閣下既信用咭扣取費用。

5:30PM左右，閒走到船頭，突然響安!!!大聲到嚇了一跳!! 原來船要開了!!很多乘客都已經企係欄杆邊欣賞沿途景色，郵輪駛過筲箕灣、鯉魚門、將軍澳等向東邊出發駛向公海，還睇到美麗夕陽呢~~

6:00PM左右就到另一間免費餐廳”藍寶石主餐廳”進食晚餐，餐廳分為三層，大堂中間有大型水晶燈，樓梯還放了一座鋼琴，感覺好靚好高貴。這間餐廳主要提供套餐，有前菜、主菜及甜品，選擇種類頗多，有中式及西式菜式比大家選擇。大家覺得份量不夠的話，還可多點一份前菜或主菜。又話者想食得豐富點，可加US$20-30 點選龍蝦、牛扒等美食。不過要留意返這餐廳晚餐時間分為兩個時段，第一時段係5:45PM，第二時段係8:00PM，而且要齊人數才可入座，不然要在門口排隊等候。