【隨行遊記】與牛同眠 躺臥於塔門大草原上 (露營篇)

塔門已經去過好多次，但講到露營今次都係第一次。今次同行大約10個人左右，初頭都有啲擔心，因為知道塔門唔屬於漁護署指定露營點，又無爐無檯無櫈，所以事先去淘寶淘返最基本要有嘅檯同櫈，方便煮食時用。

一張檯加四張櫈差唔多重10kg，又要帶航拍機，所以決定由馬料水碼頭坐船入去塔門。約孫仔去大圍等，然後坐的士去碼頭。我去到大圍見到佢只係拉住架車仔，無揹航拍機袋，我就知出事，佢竟然咁大部機都可以漏帶。好彩佢住得近，立即截的士返去拎都仲趕得切12:30pm開出果班船(如果下班馬尿水開出嘅船要等到3:30pm)。

其實去塔門露營揀營位都幾講究，通常有三處地方適合起營(包括球場附近、山上草原及近呂字疊石的山坡上面，詳細位置可參考下面地圖)，各有好處壞處。今次好彩有朋友一早入塔門霸位，霸了球場門口的一個比較平坦而且唔當風嘅位置起營。

今次露營都幾準備充足，有天幕，又有檯櫈，甚至連裝飾用嘅LED閃燈都帶埋。LED閃燈除咗用黎裝飾之外，夜晚掛上LED閃燈可以避免行過時被營繩放倒。出發前都擔心過塔門係好多牛，甚至怕會有野豬出沒。為咗可以趕走牛隻，我地仲特登買咗幾個掛鈴，以為聆聲可以嚇走牛群(但經過實測後，牛牛係唔怕聆聲)。攪完一大輪功夫起營，裝好天幕，就去涼亭位置欣賞塔門日落，然後就要去準備晚餐。由於擔心牛隻會走來搶食物，今次煮食方面都以簡單為主，盡量避免花巧同煮食時間太長，我地嘅晚餐包括有意粉、雞扒、腸仔、白菜仔及雜菜湯，夜晚仲有糖水。

非常好彩，煮晚餐嘅時候，牛群已經躺在草原上休息，全程都無走過來騷擾大家。晚餐過後，大家就去欣賞月色。當晚月亮好光，而星星就顯得比較暗淡失色。欣賞完月色，食埋糖水後，大家都決定早啲瞓覺，抖足精神迎接第二朝早嘅日出。

果朝日出其實唔係正東面升起，大家都覺得好奇怪，因為尋日大家都以為日落位置的相反方向就一定係日出位置，所以都將天幕SET在日落相反方向嘅位置擋朝早嘅太陽，點不知一到日出，太陽就曬到應一應。返黎上網查過先知，因為地球係會傾斜咁圍繞太陽自轉同公轉，日出不一定係正東面，尤其香港冬天日短夜長，日出日落位置不一定係相對，所以只好怪自己細個無聽書。

影完日出，就去餐廳食早餐，非常方便。食飽飽後，就開始準備航拍。

塔門航拍的小提示

拍攝弓背灣及呂字疊石︰於疊石山坡一帶有不少空地作為起飛點，拍攝呂字疊石時可嘗試使用POI圍繞著疊石拍攝。

拍攝弓洲及赤洲(塔門東北離岸)︰於足球場旁有山徑梯級上山前往龍景亭，經過龍景亭後沿山路走，貼近岸邊有開揚的草坪適合起飛拍攝弓洲。由於赤洲相對較遠，或需飛越超過1000米外範圍才能拍攝，拍攝時要注意安全。

拍攝碼頭沿岸漁村︰可於塔門碼頭或海旁街尾空地起飛，碼頭隨時會有船隻泊岸或垂釣人士，起飛及降落時必須注意安全。

後感︰

經過上年去灣仔露營時被一隻進擊的牛牛搶去食物的尷尬經歷後，對牛牛確實有點害怕。出發前一直擔心塔門的牛群比灣仔還要多怎麼辦，只想著如何趕走牠們。但經過今次在塔門一整晚觀察，牠們大多數只會乖乖躺在附近的草原上休息和吃草。令我意識到牠們都是大自然其中的一部分，與其找方法趕走牠們，還不如學識怎樣與牠們一起共存，一起享用這片大草原。(ps: 話須如此，我還是看見其他營友被搶去食物，大家一齊慢慢學與牛牛共存吧 :p) 【星行跡】

今次與牛共同生活一天的經歷固然特別，以往對牛的害怕經過今次後，基本上已消除了，原來牠們也是很友好的動物。此外，令我深刻的是今次露營有一班聾啞人士，他們不能用言語表達，只用手語，但我也看見他們共同努力，克服露營所需面對的困難。離開時，他們亦很有公德心，把地方弄得很整潔，為珍惜大自然盡自己一分努力。而且在我準備使用航拍機時，他們也有主動親切的向我打招呼問好，雖然說不出話，但簡單幾個表達足以看到他們開朗一面，也是令我感覺最深刻的。【孫仔】

觀看影片

露營日期︰2015年11月

隨行資訊

各項評分 (5分為總分)

合適營位︰ [非官方指定營地]
觀星指數︰
觀賞日出︰
觀賞日落︰
通訊接收︰
水源位置︰
其他設施︰
整體評分︰
隨行裝備︰相機、三腳架、檯櫈、帳幕、天幕、睡袋、睡墊、萬用刀、冰箱及食物
塔門交通︰由黃石或馬尿水乘坐街渡前往，黃石碼頭亦有快艇接駁往來塔門 (詳細資訊可參考下面介紹或瀏覽運輸署網站)
詳細介紹︰

注意事項︰

• 塔門並非漁護署指定露營地點，起營或隨意生火都有機會被檢控
• 塔門牛群比較多，小心存放好食物及切勿餵飼牛隻