【山竹過後】東龍島白膠灘絕景 夠浪漫了嗎?

今年9月颱風「山竹」吹襲香港，令到香港很多偏遠地區都變得滿目瘡痍，各地區恍如經歷了一場世紀災劫一樣。

山竹過後，我們也有到處去協助災後的清理工作，希望能夠盡一點綿力。在我們參與的幾次義工活動中，東龍島的發泡膠石灘必定是最令大家深刻難忘，而且帶給大家最大的衝擊。

清理活動完結後，我們訪問了幾位義工，他們留低了以下一些關於他們第一次去東龍島清理後的感受和訊息，希望呼籲大家要愛惜環境。

Manyi: 「望住依片膠海，有好大嘅無力感，但係其實要去改變現代人嘅生活模式，無力感仲更加大，所以都係低頭繼續默默執發泡膠粒，希望自己嘅身體力行可以慢慢改變大家。」

Witman: 「已有一段日子無去東龍島郊遊或者露營，颱風山竹吹襲後，同隊友去到島上做義工清理垃圾。初時，我仲好慶幸島上嘅士多無太大損壞，但走到附近營地一看，就覺得好心痛，原來白色發泡膠膠粒舖滿營地上。後面嘅石灘就更慘不忍睹，尤如一個白色嘅波波池，隨手用筲箕一撈，不消五分鐘，已經可以把一袋黑色大垃圾膠袋裝到滿滿。可想而知，海洋接收了人類大量嘅垃圾，而風暴又把垃圾重回大地，循環不息，永無止境！大家要立即行動，源頭減廢，停用即棄用品，減少對地球傷害！」

小瑩: 「山竹襲港之後，發現市區受到好多影響，但離島亦唔例外。於是就同一班朋友去左東龍島執垃圾，但係無諗過，去到東龍島重災區之後，發現成地都係白雪雪嘅發泡膠粒之餘，發泡膠仲推積到15厘米左右咁厚，當時有啲唔知點算好同好無奈。然後我再細心觀察，仲有比颱風折斷左嘅樹枝中間都有好多發泡膠粒，而且海面上亦都有唔同大小嘅發泡膠飄浮緊。發泡膠雖然為我地帶黎方便，但對大自然就帶黎好嚴重嘅影響，所以我希望大家可以減少使用發泡膠，齊心協力保護地球，為環保盡一分力啦！」

孫仔: 「山竹颱風過後，周圍都災情嚴重，去東龍島之前已去過其他地方幫過手清理，惡劣情況各有不同。但要數最令我嚇親，就係東龍島嘅發泡膠海，一眼望埋去心裡面已經「嘩…」左一聲，石灘上面好似鋪左層白雪咁，行埋去準備清理果時，踩落去原來個發泡膠海係深海黎，企都企唔穩。果刻諗到，原來平時貪一時之便使用發泡膠嘅代價係可以咁嚴重。我希望藉此呼籲大家，盡量減少使用發泡膠，以及其他即棄用具，為保護環境出一分力。」

Cman: 「細個好期待颱風到來，因為可以唔駛上堂，大個左就期待可以帶來一日有薪假期，但經過今次颱風「山竹」吹洗過後，睇見佢為大家帶來嘅禮物，真係一次都嫌多，建築物被破壞，百年老樹被吹倒，為海邊帶來一大遍白色雪地，可見大自然既破壞力真係好驚人，每次見到都令我好心痛，真係唔希望再有下一次。與此同時，希望大家正視氣候變化既問題，為大自然，為環保出一分力，減少用塑膠產品啦!」

Alan: 「我想講嘅係義工都係會有情緒，望住一片白茫茫，心裡面灰亡亡! 我仲忍唔住講埋出口囉！真係好灰呀﹗因為我覺得就算用一生嘅時間去清理都無辦法完成…..依啲就係人類嘅智慧做成！人最寶貴係智慧，最失敗都係智慧！如果有一日上天把人類智慧拎走時…就會同一般海洋生物一樣，食住發泡膠等著死亡吧！請大家好好出分力係環保上!」

Ben少: 「有冇諗過當你享樂時，同時為地球製做咗幾多垃圾？呢D垃圾你以為見唔到就唔關你事？今日種下嘅因就係明天嘅果！遲早要還！從現在開始盡力保護環境！保護地球吧！也是為你的未來和下一代著想！」

Don Sir: 「我曾經在會展舉辦過飄雪活動，在香港可以睇到落雪，大家都會覺得好新奇。會場內漫天飛雪 (即“發泡膠”)，有時都覺得幾浪漫。玩樂過程中，如果飛雪黏著你，你會識彈走它。我地識得整走發泡膠粒，但係海中嘅魚類或者其他生物就冇得揀。佢地見到發泡膠果時，會以為天降美食，急不及待要吃下它。發泡膠粒既不能提供營養，更可能會引致海中生物死亡，從而影響整個生態系統。今日睇見東龍島嘅情況，令我下定決心要為環境出一分力，一定要減少使用發泡膠。」

我們去東龍島做義工當天，天氣還是很熱。大家望著眼前這雪白一片的石灘，我們知道冬天未到，但好像已經到了聖誕。眼前白色一片不像雪，還嗅到一陣陣海水味道，毫不浪漫，我們只感到無奈。腳踏在膠海之中，我們真的會站不穩腳，然後大家或會問為何東龍島變成這樣，同時又會反問自己有沒有份造成今天東龍島的結果呢？相信答案大家都心裡有數吧。

一班義工只用了一天拾起了接近二百袋發泡膠垃圾，但只是白色膠灘最表面的一層，還有那些沒法清理的微細膠粒，可能永遠留在這裡。或者，有些膠粒會隨風飄回大海，然後不知道何時又回到我們的身邊。

它們永遠跟著我們，而且不離不棄，這樣夠浪漫了嗎？

請分享出去，同你身邊的人說聲「絕膠」啦!

義工︰「對住依片由發泡膠堆積而成嘅雪地，你覺得仲有冇希望呀?」

FolloMe︰「有D人話無，但我覺得…有」

(文、圖︰星行跡；影片︰星行跡、Alan；航拍︰孫仔)