出發日期：21/10/2017
行程：落馬洲->福田口岸->喜茶->日日香鵝肉飯店->teamLab->探魚
大半年前去過深圳後就對哩個地方改觀不少，咁啱近期有個被譽為全球十大必看的世界巡迴數碼展覽係深圳舉行，就決定約埋一班朋友北上玩樂搵美食啦! gogogo~
早上11點左右到達落馬洲，出發啦~
出左福田口岸就直接坐的士到歡樂海岸城，車程約20分鐘(車費人仔36)，大家亦可選擇坐地鐵9號線到深圳灣公園站E出口，都好方便~
先到近期大熱既”喜茶”買返杯芝士茶嘆下先，上次飲過之後就好掛住了，初時會諗芝士同茶一齊飲會否好奇怪? 點知味道出奇地夾，超好味! 芝士愛好者一定會一試難忘，推薦大家黎試下。今次點左芝士四季春茶，朋友就點左芝士綠茶，下次試下芝芝芒芒先，好似好好味咁。我地買完就開始排長龍了，好彩11點半左右黎到，不然要等好耐先有得飲呢~
飲完喜茶，就去隔離”日日香鵝肉飯店”買外賣，因為太多人等位，諗住買外賣會快啲，點知都係要等…….門口玻璃窗見到啲師傅不停切燒鵝、滷味等，好吸引呀~~好想快啲有得食…….
等外賣期間，見到旁邊有一間間卡啦OK房，乜原來而家唱K咁方便，隨街都可以唱返幾首，少去深圳既我，好大鄉理呢 ><
付款方法以微信付款，可惜大家都無微信，咁啱間K房仲有5分鐘免費任唱，可以過下口癮，唱返2首歌仔 XD
唱完就有外賣食啦，餐廳提供埋手套比客人，都幾窩心喎~
買左半隻燒鵝，一份鵝翼加一份鵝腎，味道唔錯呀，怪不得咁多人等位啦~
附近仲有間KITTY CAFE~~
向展覽館方向出發~
睇到網上Blogger話要排好耐隊先可以入場，為免浪費時間排隊買飛，所以一早係KLOOK買定，到時就可以直接排隊入場。可能展覽已經開始左兩個月，所以當日排左15分鐘左右就可入場了。
提提大家，現場買飛只接受信用咭或微信付款，唔接受現金的，平日門票人仔199，假日門票人仔229，特惠票人仔160。整個展覽館有14個展品，由於館內無洗手間，所以參觀前最好去左先。
入去啦~
＜呼應燈森林 – 一筆 / Forest of Resonating Lamps – One Stroke ＞
燈光會隨著時間不停變化，唔同顏色有唔同感覺，周圍亦有好多鏡，感覺空間無窮無盡。
＜光球管弦樂團 / Light Ball Orchestra＞
場內有好多唔同顏色既發光球體，大家用身體接觸球體時，顏色和聲音都會產生變化，令場面變得色彩繽紛。
＜串聯吧！積木小鎮 / Connecting! Block Town＞
大家可以把唔同既積木放係枱面上，利用影像投射效果，會出現更多汽車同火車，然後會變成一座小鎮景觀了。
＜彩繪城鎮 / Sketch Town＞
利用門票就可以換取一張畫紙，圖案有汽車、貨車、房屋、太空船、穿梭機等，填上顏色後，再去Scan一下自己既作品，圖案就會係屏幕內立體地出現了。
朋友們好認真創作自己獨一無二既作品~
開始SCAN我既作品啦，跟住係屏幕內搵下自己架車先，搵到啦~~~
大家可以係度發揮無限創意呢~~
<天才跳房子 / Hopscotch for Geniuses>
圖案會投影在地上，大家跳落圖案上就會發出聲音，顏色亦會轉變。
<被追逐的八咫鳥、追逐同時亦被追逐的八咫鳥、超越空間 / Crows are Chased and the Chasing Crows are Destined to be Chased as well, Transcending Space>
展品以光描繪出八咫鳥在空間中飛，它會識別觀賞者的位置而邊閃躲邊飛翔，但如果無法躲避而撞上了觀賞者，就會化做花朵消散，所以每次睇到既作品都會有所不同。
<Animals of Flowers, Symbiotic>
身上長滿花朵既動物會係通道中來回走動，當大家觸碰動物時，花朵就會凋謝~
＜花與人，不為所控卻能共生－ 度時如年 / Flowers and People, Cannot be Controlled but Live Together – A Whole Year per Hour＞
大家可以係空間內睇到花一年四季中的綻放與凋零，觸碰花時，花會瞬間自動綻放或凋落、枯萎、逝去。
＜彩繪水族館 / Sketch Aquarium＞
與＜彩繪城鎮 / Sketch Town＞一樣，不過今次變左水族館，同樣地用門票就可以換取一張畫紙，有海龜、魷魚、八爪魚、海馬、雞泡魚等唔同圖案，填完顏色後就去Scan啦~
<小人所居住的桌子 / A Table where Little People Live>
小人兒會係枱上走黎走去，當大家把唔同物體放係枱上，小人兒會改變移動軌跡，會跳或爬過物體，與大家一齊互動。
＜水晶宇宙 / Crystal Universe＞
數以萬計的燈，令大家進入左一個宇宙空間，可惜工作人員不停叫我地向前行，唔可以停留，所以要走到最後才可拍照。
<水粒子的世界 / Universe of Water Particles>
房間內會睇到一條虛擬瀑布，由電腦形成的水流包含著無數水粒子，傾瀉係虛擬既岩石上。
<金浪 / Gold Waves>
透過無數水分子的連續體來表現水既形態，好澎湃呢~
出口處會有紀念品售賣，還可以打印自己鐘意既相片係T-SHIRT上，朋友將之前畫好既圖畫打印左件T-SHIRT送比我作生日禮物，好鐘意呢! 多謝你地呀!
成個展覽參觀左大約3小時，每個展品都好特別，透過唔同既燈光、音效及影像等配合，以互動形式令大家投入其中，真係好睇又好玩。展覽期會去到30/11/2017，所以大家有時間要去睇下，唔好錯失機會呀!
離開就坐的士到星河COCOPARK食”探魚”，車程約15分鐘(車費人仔30)，等左大約1小時，終於可以入座了，超多人等位呢~
可以買果茶入餐廳飲 😛
叫左鮮青椒烤凌波魚(超辣呀!青椒好似唔駛錢勁多)、蒜香烤凌波魚(唔辣)、醬香烤鮰魚(唔辣)、蒜蓉烤扇貝(超辣)等，仲有其他配菜、小食可以點，鐘意食魚既朋友唔可以錯過呀~~
最後，朋友仲送上生日蛋糕，真係好多謝大家陪我玩之餘仲慶祝埋生日，謝謝大家! ^O^
teamLab 官方網站：
https://www.teamlab.art/tw/e/shenzhen/