出發日期：8/4/2017-15/4/2017
航空公司：中華航空
住宿：
Day 1-3: 花蓮民宿 (花蓮市成功街165號) (城隍廟旁)
Day 4-7: 朋友台北家
行程如下：
DAY 1: 香港->台北桃園機場->花蓮民宿->東大門夜市
DAY 2: 太魯閣->神秘谷道->長春祠->燕子口->布落灣->天祥->綠水步道->七星潭
DAY 3: 鯉魚潭->雲山水->新光兆豐休閒農場->芭崎休息區->牛山呼庭
DAY 4: 花蓮港->花蓮文化創意產業園區->台北朋友家
DAY 5: 五分埔商圈
DAY 6:
DAY 7: 十分瀑布->基隆夜市->新月橋
DAY 8: 板橋435藝文特區->新月橋->大臺北都會公園->三峽老街->台北桃園機場->香港
台北去左好幾次，花蓮都係第一次踏足，今次同行既係UKULELE(“UKU”)朋友仔，大家平時係香港JAM歌JAM得多，都想試下帶住UKU衝出香港JAM下歌仔，一於就比多個理由自己去下旅行啦 😛 CHECK好手提行李尺寸要求，確定可以自攜UKU上機，安心出發!
另外，要特別多謝台灣朋友提點訂火車票程序同方法，還幫我計劃好了4日花蓮行程，仲整理好一份小報告，圖文並茂清楚地介紹景點特色同行程編排，真係幫左我唔少忙，萬分感激!!
由台北坐火車到花蓮大約2小時，我地一落機就直接到花蓮，為免到時買唔到火車票，所以一早係網上預訂了。留意返，乘車前2星期先可以係網上訂票，所以去程票同回程票要分開兩日預訂，輸入護照號碼同信用咭號碼就成功訂票啦! 記住PRINT返張收據先可以取票架。提提大家，網上訂票時，如訂4人票可揀桌型座，咁大家可以多張枱用，只要唔怕坐倒頭車就好，但如果6人而訂4人桌型座+2人一般型，好大機會分開坐，所以6人都係訂一般型比較好，一定可以坐埋一齊，唔駛到時麻煩其他乘客換座。
以下係台鐵官方訂票網站：
http://twtraffic.tra.gov.tw/twrail/
好啦~係時候出發啦~
第一次坐中華航空，飛機餐都OK啦~
超好天! 咁啱見到另一架飛機降落緊~~
落機後，仲要等埋下一班機既朋友，所以有時間買電話咭同攞火車票。取票方法有2種，可到火車站售票窗口或開車前30分鐘到郵局或便利店取票(需付每張8元台幣服務費)。因為怕唔夠時間到火車站攞票， 所以落機先到便利店取票。由於一航廈係無便利店7-11的，所以坐無人駕駛列車到二航廈去。
搵到取票機，揀選台鐵，輸入訂票號碼及護照號碼，拿取收據，然後到櫃台付服務費就可取票。初時唔識用部取票機，噤左好一段時間，好彩職員都好熱心幫我地先可以順利取票，真係好NICE NICE 呢!
攞左車票，買好電話咭，朋友又到齊了，就乘坐今年3月先通車既桃園機場捷運到台北火車站，沿途指示都好清晰~唔會迷路~
先購票，有悠遊卡的話，充值後就可直接入閘，票價為台幣160元~
捷運分為紫色直達車同藍色普通車，由第二航廈到台北車站，直達車只需38分鐘，普通車就需要50分鐘，雖然時間唔會差太多，但直達車只有5個站可以上落，繁忙時間一定會快點。
車廂內設有行李架同車站顯示屏，對座式座椅旁邊仲設有無線充電座，十分方便。
再轉台鐵，咁啱見到有班女士跳緊民族舞~
沿住指示，好快就搵到台鐵入閘口。
上車前，係車站附近店鋪買左午餐充飢~
到花蓮車種有好幾款，今次訂購既係普悠瑪，車廂比較新而時間最短到達花蓮 (2小時11分)~
試下鐵路便當先，味道唔算好差，只係覺得唔夠熱，便利店既關東煮就覺得普通了點，但朋友十分喜歡 XD
到達花蓮時差不多日落了~
落車後再換埋回程車票，火車站售票處攞既車票同便利店係唔同的~
包車司機已經係火車站等緊我地，要快點跑出去先得了! 黎緊2日包左架8人車，司機仲提供免費火車站接送服務，好貼心呢。
今次一行六人，大家想有個共同地方JAM下歌仔，所以係AIR B&B訂左一棟3層既民宿，自己住曬成棟都幾開心架，地下果層有客廳+廚房+廁所~
二樓有5人房+2人房+廁所~
三樓有3人房+廁所+客廳，大到真係可以住十幾人!
屋主好有心準備好花蓮特產”奶油酥條”比我地享用，其實就係炸吐司邊，食落甜甜的，很香脆，又幾好食喎! 檢查好房間，屋主放底鎖匙就離開了，門口既單車都可以隨便比我地借用呢!
休息左陣，又再出發，由民宿行到夜市約10分鐘路程，夜市對面既石藝大街，每晚7:30-8:30會有花蓮特色之一原住民跳舞表演，有時間可以去睇下。
太肚餓既關係，等唔切睇表演，要去醫肚先! 與台北夜市相比東大門夜市感覺寬敞同乾淨好多，唔會有機車係身邊駛過，星期六晚上都唔會太多人太擠迫，行得比較舒服，不過，可能唔多遊人既關係，有啲食店十點左右就關門了，唔似台北開到凌晨時份~
夜市內有街頭唱歌表演~
嘆下台灣啤酒~
夜市都幾大，主要由福町夜市、原住民一條街、各省一條街、自強夜市組成，集合左唔同既花蓮美食，除左美食外還有遊戲攤檔同售賣紀念品店鋪~
行經海鮮店，門口掛了一條大魚，台灣人初時稱為翻車魚，但因為覺得個名唔太吉利，所以後期改名為”曼波魚”，尾巴圓圓的，都係第一次見~
行到另一邊又有原住民街頭表演~
行曬好幾條夜市街，最後試食左：黃金蛋、串燒、潤餅捲、炸大魷魚、香蔥肉捲、生煎包、地瓜球、豬肉香腸等，樣樣食啲都已經食飽了~
最想再ENCORE既係香蔥肉捲同埋潤餅捲，幾特別又好食，大家有機會都黎試下呀~
今日行程就告一段落啦，食飽返去民宿早點休息，明天一早重點遊太魯閣!
花蓮+台北8天遊 DAY 3~鯉魚潭~雲山水~新光兆豐休閒農場~芭崎休息區~牛山呼庭
花蓮+台北8天遊 DAY 5,6,7~五分埔~十分瀑布~基隆夜市~新月橋
花蓮+台北8天遊 DAY 8~板橋435藝文特區~新月橋~大臺北都會公園~三峽老街