天公造美呀!今日超好天呢!!希望今日順順利利，同事可以有個完美婚禮啦!!
著靚靚整裝好後，就去餐廳食早餐。食物種類雖然比那霸酒店多，但我都係比較欣賞那霸酒店既豬軟骨麵~
見到有海鹽、紫薯和黑糖味牛油，幾特別咁，等我又試下先，味道同普通牛油差唔多，有點失望~
9:30 左右出發到教堂，沿住酒店大門出，右手邊會見到另一間教堂”Chapel Bianca”。
行左5分鐘就到左今日舉行婚禮既教堂”Aquagrace Chapel”。
入到去就見到同事(新郎)化好曬妝，畫到條眉咁英，成個日本人咁，緊係要影返張相交差啦，事關老細千叮萬囑我地要影多啲相比佢過目~
襯未有咁多賓客，周圍影下相先~
教堂外有好幾個影相位，每個位置都影到靚相，真係影到唔捨得走 XD
來賓可先到休息室坐下，室內環境裝飾得幾靚，感覺都好舒服~
休息區分左兩邊，其中一邊需要除鞋內進。
炎熱夏日，仲有飲品比大家解渴，照顧得好周到~
枱面上放左今日既婚禮時間表~
走到二樓會場，會有另一個宴會廳，出面露台可睇到沙灘~
10:30 全部賓客已經就座好了，教堂最多容納60人，今天全坐滿了! 場面真係好熱鬧! 教堂內環境都好靚，面對住個大海，加埋超好天氣，難得坐係入面，不停影相好正常吧 😛
婚禮11:00準時開始，音樂響起，先由一對花仔花女進場，之後新人慢慢步入教堂，可能新人太緊張，所以步入教堂既場面都好攪笑下，可惜婚禮開始後就唔可以拍攝同錄影，影唔到新人蝦LOOK攪笑既一面。現場有人彈琴，亦有人唱LIVE，神父係一位外國人，講野都好風趣幽默，所以整體氣氛壯嚴得黎又帶點攪笑，感覺唔錯~~
儀式半小時左右就完成了，新人退場後，會到教堂門前影大合照及團體照~
攝影師要求一齊做個驚訝表情，大家都好合作交戲呢!
教堂距離酒店很近，真係超方便~~
之後再走到沙灘影大合照~~
12:30宴會開始，室內以長枱形式就座，新人坐係最前方面對住我地~
先到戶外切結婚蛋糕~
開始致詞，感人既一刻終於到了，難得聽到同事感性發言 XD
以橙汁代酒乾杯後，午宴開始~
婚宴菜單係琉球料理套餐黎~
有三款冷盤、刺身拼盤、燒魚、琉球黑豬柳酥皮卷、海藻鯛魚肉丸配柴魚昆布湯、雜錦魚生飯、芒果乳酪布丁配生果。每款菜色細細碟好精緻，味道都唔錯，初時仲驚會食唔飽，點知未到甜品已經飽了，真係眼闊肚窄呢 😛
新人好有心思準備左即影即有相機，為每位來賓一齊影相留為紀念。
婚宴結束，新人轉到殘波岬燈塔影外景婚照，我地幾個朋友又一齊去湊下熱鬧幫手影下婚照~~都影得唔錯吧?? XD
今日天空更藍又有太陽，婚照應該會好靚~~
等我都影返張靚相先~~無敵海景，仲要無雲~~~
唔打攪新人太耐了，我地幾個轉去下個景點”真榮田岬”，哩度係玩潛水同浮潛熱點黎，特別之處係可以到”青之洞窟”睇到海中藍光。但今次我地既目的係為航拍而唔係潛水呢~~
展望台附近景色~
本想走近海邊，但當日禁止游泳想行落去都唔得，有點可惜!
無做資料搜集既關係，原來另一邊可以走到天然沙灘，真係白白錯失左個睇靚景既機會 ><
要到今日最後一個景點了，永旺夢樂城沖繩來客夢(AEON MALL Okinawa Rycom)，由殘波岬酒店坐的士到購物商場車程約40分鐘，車費4,890YEN。
沖繩最大既購物商場，館內有超過230間店舖，共分為5層，電影院就係4樓~
頂層係用餐區遠遠都睇到海景~
餐廳主要分佈係4樓同5樓~
今晚揀左商場內既餐廳”無添 くら迴轉寿司”~
大部份壽司都係100YEN一碟，當然仲有其他食物可供選擇~
2人叫左廿幾碟，埋單只係3,000YEN左右~好抵呀~~
除左可以係迴轉帶揀壽司外，還可以自助點餐，然後由輸送帶送餐，另一個有趣既地方係，食完既碟自己放入收集口內，每滿五碟就會有一次抽獎機會，電子螢幕會轉動，羸左既話會有扭蛋跌落黎，真係有得玩又有得食!
近期商場有優惠，每購物滿5,000YEN(含稅)以上(包括餐飲)，可到1樓觀光諮詢台 (TAX FREE COUNTER)免費兌換152號巴士回程車票1張! 購物5,000YEN對我朋友黎講無難度啦!
巴士時間表：
http://cht.okinawarycom-aeonmall.com/static/detail/access-bustime
見仲有少少時間，臨走前都要衝入SUPERMARKET行個圈先離開~
出左觀光諮詢台對面就會見到巴士站~
巴士準時開出，上落乘客唔多，所以45分鐘左右就回到旭橋站了。
攞住太多野，回到旭橋站就轉乘的士回酒店，CHECK-IN後，可直接上房，之前寄存既行李已經放係房間內了，好窩心既服務呢! 大讚!!
哩兩日買既野，枕頭同苦瓜都買埋返香港! 朋友大讚個枕頭好好訓，見個行李箱仲有好多位，就買個返港試下啦~XD
