出發日期：6/5/2017-9/5/2017
航空公司：港龍航空
酒店：
Day 1 & 3: 沖繩松山索爾維塔酒店 (那霸市) (Solvita Hotel Naha) (地址：2-17-17 Matsuyama, Naha, Okinawa-ken, 900-0032, Japan)
Day 2: 沖繩殘波岬皇家酒店 (Okinawa Zanpamisaki Royal Hotel) (地址：1575 Uza, Yomitan-son, Nakagami-gun, Okinawa)
行程如下：
DAY 1: 香港->那霸國際機場->酒店->國際通->平和通商店街->第一牧志公設市場->國際通屋台村
DAY2: 酒店->波上宮->美國村->萬座毛->残波岬->酒店->花笠食堂
DAY3: 酒店->Aquagrace Chapel->真榮田岬->永旺夢樂城沖繩來客夢(AEON MALL Okinawa Rycom)->酒店
DAY4: 酒店->瀨長島(Umikaji Terrace)->沖繩平價精品購物城(Ashibinaa Okinawa Outlet Mall)->那霸國際機場->香港
四年後重遊沖繩主要目的係為左參加婚禮，同埋今次係第一次參加海外婚禮，心情難免有點興奮同期待! 雖則同事話我地係掹衫尾去，但平時唔可以3人一齊放假，今次老細破例批左假!! 唔係唔去呀!? XD
飛沖繩只得幾間航空公司可選擇，見港龍航空既航班時間同價錢跟香港航空差不多，為左食個好啲既飛機餐，今次就選乘港龍航空啦!
乘坐晏晝12點15既航班出發，飛機餐有Häagen-Dazs雪糕仲有奇華曲奇!
由香港到沖繩，飛行時間約需2個半鐘，時差一個鐘，所以4點多先到沖繩那霸國際機場。到啦!到啦!
臨離開機場前，大家記得攞返本旅遊雜誌呀! 內裏除了介紹景點同美食外，仲有好多COUPON架!! 買野食野隨時有折有野送呢!! 所以唔好唔記得攞啦!
出左國際機場，轉右直行就可到沖繩內陸機場~
乘扶手電梯上一層，左手邊門口會見到單軌電車指示，過埋條橋就到車站，十分方便。
單軌電車總共有15個站，只需27分鐘就可走完全區電車站。
除左單程車票外，大家都可購買1日票(700YEN)或2日票(1,200YEN)，全區不限次數任搭，有效時間係由購票時間起24或48小時，所以如果要玩那霸市既話，真係好抵用呢! 單程車票差不多都要300YEN一程，乘搭2次或以上已經可以回本了!
以下係單軌電車車資表比大家參考下~
http://www.yui-rail.co.jp/tc/faretable.html
先到美榮橋站，到酒店CHECK-IN~
步行大約15分鐘左右就到了~
房間唔算大，但整體都清潔乾淨感覺舒服~
休息過後，係時候到國際通會合另一位朋友，酒店距離國際通步行約15分鐘路程就到了~
國際通係那霸市其中一個必遊景點，主要都係售賣紀念品、手信既小商鋪，除此之外仲有不同餐廳供大家選擇，有啲沖繩料理店內還會有沖繩歌舞表演呢!
沖繩出名菠蘿應該好多人都知，除左原個菠蘿買黎食之外，仲可以買返屋企種植，細細個好得意呢~
係店內聞到好香蕃薯味，忍唔住就買左黎食，個紫薯真係超甜呀!!
芒果雪糕都好好味，芒果肉就黎多到滿瀉啦~
手信店內總會見到沖繩獨有既風獅爺~
平和通商店街係沖繩代表性既懷舊商店街，有土產店和服飾店等超過200間店舖，有屋頂既關係，就算落雨也不怕呢!內裏有我最愛既100YEN店和藥妝店，留意返，係藥妝店內購物滿5,000YEN以上出示護照就能免8%既消費稅啦!
六點多走進第一牧志公設市場，好多店舖已關門了，只有數間店鋪營業中，客人可在地下購買海鮮後，到二樓食堂選擇烹調方法如日式、中式或琉球料理等。
哩間係日本最大規模”鹽”專賣店，店內所有鹽都可免費試食，有芥末鹽、柚子鹽、綠茶鹽、咖哩鹽、黑芝麻鹽等，味道都幾特別，店內仲有鹽製美容產品，鹽製甜品，其中鹽味雪糕最為受歡迎，大家可直接把鹽灑在雪糕上，感覺應該幾特別吧~
沖繩泡盛都好出名，飲開酒既朋友都可以買支黎試下~
Calbee Okinawa，太肚餓趕住食飯，所以無入去睇下呢~
國際通屋台村係2015年6月才正式開幕，屋台村即係路邊小鋪既意思。
屋台村面積不算大，店舖約20間左右。
晚上七點多到達，門口幾間店鋪已坐滿了客人，每間餐廳都係細細的，只可容納7-8人，門口最多放2-3張細枱，雖然有點擠迫，但氣氛真係十分熱鬧!
現場仲有人唱LIVE表演呢~
今次就揀左蝦夷前 CHOKOTTO壽司~
由於門口桌子只提供熟食，想食魚生海膽既我地只好在門外等位，餐廳內座位真的有點迫，肥DD真係唔知點算好了 😛
無意中發現後方既蛇酒，真係無勇氣嘗試呢 ><”
師傅就企係我地面前不停整壽司，閒時同客人吹下水，氣氛幾融洽，可惜我地唔識日語啦~
杯墊都有風獅爺圖案~
大家各自點了一客海膽三文魚子飯 (2,780YEN)~
出示COUPON每人就送左一杯特製泡盛酒，但唔好酒精既我只可淺嚐，朋友飲完話果晚訓得好好，可見酒精濃度唔少呀 XD
哩間店舖主要售賣以沖繩為主題既T-SHIRT，情侶裝及親子裝都可以係度搵到，我都買左件T-SHIRT同草帽，迎合返沖繩STYLE先~
晚上既國際通仲係人多車多，但每逢星期日既12:00-18:00，國際通會禁止車輛通行，馬路變成行人專用區呢!
今日既戰利品，好鐘意頂草帽呀~~黎緊3日都可以戴呢~~同埋4盒蝦餅都好好食，誠意推介大家買黎做手信!
明天出發到美國村去!