黎到行程第三日，今日會到太宗台睇釜山最古老嘅燈塔，再到龍頭山公園內嘅釜山塔，最後到中區著名購物街”光復路”SHOPPING。
一早就食鮑魚及海膽做早餐，會唔會奢侈左啲呢?? 😛 只要坐地鐵1號線到南浦站，於1號出口直走約5分鐘就可以搵到濟州家了。
今次叫左鮑魚粥及海膽昆布湯(配白飯)，2款份量都唔少，食落有好濃嘅海鮮味，加埋蘿蔔、泡菜、魚乾同紫菜一齊食仲好食!! 唔好以為食鮑魚海膽好貴，埋單只需45,000WON(約港幣300蚊)就可以食到以下食品~大家有機會都要黎試下!
食飽就出發去太宗台~
到南浦站6號出口嘅巴士站坐8, 30, 66 或88號(車程約需30分鐘)，巴士站對面就係樂天百貨，好容易可以揾到。
太宗台主要景點包括展望台、神仙岩．望夫石、影島燈塔、救命寺、太宗寺等，為左慳返啲腳骨力，所以決定坐DANUBI小火車遊園。成人車票每位2,000WON(約港幣15蚊)，小火車行走一圈約需20-25分鐘，每隔20分鐘一班車，走路遊覽嘅話約需1至2小時。
留意返，要叫到你票上嘅號碼先可上車，所以大家可以坐係旁邊等，差不多叫到你嘅號碼先排隊等上車~
每架小火車有3卡可以載客，當日遊人實在太多了，等左大約一小時先可以上車 ><
先到展望台，遠望會見到有一個小島，因外型似水壺，所以叫水壺島，好多釜山人都鍾意到哩個島釣魚呢~
再排隊上車到燈塔，以為距離有點遠，點知坐多左個站到了太宗寺，本想坐車回到燈塔，但單向行駛既關係，要兜一大個圈先可回到上一個站，所以唯有走回頭路去燈塔。行左大約15分鐘，已有路牌指示到燈塔既兩條路，當然揀條較易行既路啦~
每個車站都大排長龍，有時還要等一兩架車先可上車~所以可能自己行路會比較快~
影島燈塔係1906年已建成了，翻新後真係唔似有過百年歷史~
大家可沿住燈塔往下走到神仙岩睇望夫石，石路不算平坦，所以走路時要小心一點~
而另一邊再往下走會有海鮮檔，大家可坐喺崖邊食海鮮刺身，感覺都幾特別，但由於已經行到好攰，見到咁多樓梯已經唔想再繼續走落去，諗起之後走上樓梯更可怕，所以喺度止步，走到CAFE休息算了 😛 坐左陣，係時候要到下一景點了~
回到南浦洞，已經好餓了，揀左間只得四款選擇既餐廳，最啱有選擇困難症嘅我。大家都揀左同一款清燉牛骨湯，湯內會有麵同飯，食曬成碗都好飽下~
食飽又要繼續行程，沿住電梯直上，就會到龍頭山公園~
首爾有首爾塔，釜山都有釜山塔，釜山塔建於1973年，塔高120米，遠遠可望到無敵大海景。為左爭取時間，我地無上釜山塔觀光，所以唔係好睇到個大海景~
SHOPPING 時間啦!! 光復路兩旁有好多購物商店，包括韓國品牌既服裝店及化妝品護膚品牌都可以係度揾到~
除左買野外，仲有好多小食店，先黎試食特濃朱古力雪糕，再食埋綠茶tiramusu~YUMMY~
行到另一條橫街，見到門口大排長龍，應該好好食掛? 就試試哩款小食，餐牌全部都係韓文唔識睇，唯有買”BEST”果款黎試，味道都OK，入面有勁勁勁多芝士~鍾意食芝士既人應該會好鍾意食~
之後再到樂天百貨，商場中間有一個高18米既音樂噴泉，據說係全世界最大，每到整點噴泉就會配合激光同音樂噴出水柱~大家有時間可以欣賞下~
有LINE STORE & CAFE，仲有毛毛熊大~
想欣賞釜山夜景?可以到11樓空中花園既觀景展望台，哩個展望台好值得黎呀~免費之餘觀景都唔錯架~
今日係樂天超市購物，最特別係買了左下角果盒人蔘返香港煲湯 XD
