遊記, 航拍 Aerial Video, 露營

【隨行遊記】最南端的極地 星空下的蒲台島 (露營篇)

2016年新嘅一天開始,就由香港最南極之地「蒲台島」露營開始這一年的第一日。

約了阿文兩兄弟跟我同事在赤柱卜公碼頭集合乘坐最早班船入蒲台島,而我跟阿庭同孫仔就坐的士去赤柱廣場先到超級市場買水及少量飲品再會合其他人。由於蒲台島士多同水源距離起營位置相對較遠,要預先準備的東西比較多。我建議較重嘅東西可以入赤柱先買,因為赤柱廣場在碼頭附近,而且超級市場開朝早8:00AM,非常方便。

以為新一年總會有好嘅開始,點知上船比船費時先知原來加咗價。由原本$40來回變到$50,無得揀就當然要硬食啦!

船程只係30分鐘,落船後第一時間就係先去搵營位啦! 要去蒲台島露營,可以選擇嘅紥營位置真係唔多,主要在南角咀一帶嘅山坡上面。就小弟觀察,山坡上面比較適合紥營嘅地點有下面兩個︰

位置A – 南氹灣涼亭四周草地

IMG_7158

短評︰草地比較平坦,但可紥營位置不多,而且比較食風,只能找涼亭擋風

位置B – 近燈塔下的山坡草地

IMG_7357

短評︰可紥營地方比較多,有些位置略為傾斜,但風不算大

起完營就可以沿南氹灣大橋回去士多食碗紫菜麵醫醫肚(仲有馳名綠豆沙、五花茶、酸梅湯同檸檬薏米水),然後就可以四處遊覽蒲台島嘅怡人景色。

南氹灣大橋其實有分岔路落去睇石刻,因為我已經去過,所以就略過石刻,直接去士多。途中可以見到好多生得好高嘅芒草,但應該同大東山嘅芒草品種唔同。

IMG_7197
在最近的坤記士多食午餐

先繞過碼頭到大灣嘅沙灘欣賞風景,這邊有幾間海鮮酒家,但坐位通常預留給旅行團食午飯用。

IMG_7209
同行 – 已經分不出是誰的影子

過了大灣後便可以先前往參觀島上的天后廟同附近嘅響螺石,然後回頭有上山寫著第三段的指示牌,指示牌有提醒大家此路段比較崎嶇難走。如果大家對觀奇石無興趣,可以返碼頭附近的郊遊徑,經巫氏古宅上牛湖頂,然後回南角咀會比較易走。

IMG_7229
有指示牌提醒遊人該路段崎嶇
IMG_7245
上山的路均加設了欄杆鐵鏈扶手

山上的奇岩怪石非常多,主要為花崗岩。欣賞完奇岩怪石,有山路接回郊遊徑到牛湖頂。牛湖頂有觀日亭可以飽覽整個大氹灣景色,亦可遠望南角咀的126號燈塔。

這個slideshow需要JavaScript。

沿梯級下山,好快就返到南角咀的營地,順便到僧人石、靈龜上山石(靈龜上山要走到燈塔位置望返轉頭睇先似)、佛手岩及香港最南的126號燈塔影相留念,然後休息等睇日落。

天黑就開始準備晚餐,由於考慮到水源比較遠清洗唔方便,天氣又凍,所以今晚晚餐就決定係打邊爐,一邊烚下烚下一邊吹水幾過癮。黎到蒲台島露營,重點節目一定係睇星啦! 因為蒲台島四面環海兼遠離市區光害較少,係香港最好嘅觀星地點。雖然天文台預告話夜晚漸轉多雲,但係蒲台島仍然睇到好多星星,即使平時比較暗淡嘅星座都睇得到,偶爾還睇到流星劃過夜空,一閃即逝。

PotoiStartrails(r)
星之軌跡

我查過天文台知道第二日天氣唔好,所以無打算早起身睇日出,睇完星就走入營瞓覺。大約8:30AM左右起身煮早餐,食完早餐就開始收拾裝備,然後返碼頭準備坐最早班船離開。

後感︰

今次能自行決定行程,時間較有彈性,所以走了「第三段」上牛湖頂。山路看似困難,因山勢有些陡峭,加上沿途都有欄桿及鐡鏈圍着,所以驟眼看以為行山者容易發生危險所以要加了圍欄。但只要適應了初段的路,也能輕鬆走完全程。沿途因為沒有大樹或密林阻擋,所以風光不錯,可以一邊行山,一邊遠眺大海的景色。

除了風景,今次亦能體驗到蒲台島的人情味。我們一行人於蒲台島的其中一間士多午膳,老闆娘非常熱情,不停提醒遊人如何打水,又讓我們可以寄放一些行李或大背囊於她的士多,方便遊人以輕省的裝束盡情遊覽小島。及後再經過那士多時,她聽見有露營人士提出晚上會打邊爐,她便提議如晚上風勢較大,可借士多避風及煮食,又或者晚上如想買飲料,便可自行取用,留待第二天才付錢,她的慷慨確實讓人感受到久違了的人情味! 【阿庭】

我從少就喜歡觀星,對星座及天象的認識都略知一二,但在香港實在很難看到滿天繁星的夜空,只可感嘆城市的光害太嚴重。即使我曾走到其他香港郊外,亦未必能夠欣賞到像蒲台島一樣的燦爛星空。這一次蒲台島露營觀星,可算是我人生中第二次感受到香港的星空是如此壯觀。

其實很多觀星者都會覺得其他人使用強光電筒照射天空很討厭,所以我每次夜行時,都會呼籲一下身邊的朋友嘗試不使用電筒照明前行,讓雙眼及用其他感官去適應黑暗的環境,才會發現黑夜行走並不困難,黑暗其實並不可怕。 【星行跡】

(溫馨提示︰露營人士在夜晚請盡量使用紅光電筒照明及避免用電筒照射天空影響其他觀星人士)

觀看影片

露營日期︰2016年1月

(文、攝: 星行跡)

隨行資訊 pin-blue


各項評分 (5分總分)

合適營位︰tick-orangetick-orange[小量]
觀星指數︰tick-orangetick-orangetick-orangetick-orangetick-orange
觀賞日出︰tick-orangetick-orangetick-orangetick-orangetick-orange
觀賞日落︰tick-orangetick-orangetick-orangetick-orangetick-orange
通訊接收︰tick-orangetick-orangetick-orangetick-orange[良好]
水源位置︰tick-orangetick-orange[較遠]
其他設施︰tick-orangetick-orangetick-orangetick-orange[有酒家、士多、公眾洗手間、涼亭等等]
整體評分︰tick-orangetick-orangetick-orangetick-orange
隨行裝備︰相機、三腳架、檯櫈、帳幕、天幕、睡袋、睡墊、萬用刀、冰箱及食物
蒲台島交通︰由赤柱卜公碼頭或香港仔碼頭乘坐街渡前往 (詳細資訊可參考下面的介紹或瀏覽運輸署網站)
詳細介紹︰outisland002

注意事項︰

  • 蒲台島並非漁護署指定露營地點,起營或隨意生火都有機會被檢控
  • 由南角咀前往士多及水井位置需要20至25分鐘路程,昂裝近南氹灣附近設有流動洗手間

你可能感興趣的文章:

隨行者投稿

歡迎各位隨行者以文字、相片或影片,跟大家分享有關香港郊遊、遠足、攝影、航拍或露營的心得、遊記、趣事及路程規劃等等。

投稿方法:請把閣下的聯絡方法(姓名及電郵地址)、文字、相片檔案或影片(請提供影片存放連結,如youtube)電郵至follow2015atw@gmail.com

#內容版權歸作者所有,FolloMe隨我行網誌管理員則保留最終刊登及修改之權利

廣告
<推薦閱讀>  【隨我行 ‧ 山】沙洲及龍鼓洲|我們的海岸公園(下)

1 thought on “【隨行遊記】最南端的極地 星空下的蒲台島 (露營篇)”

發表迴響