【隨行遊記】觀瀑賞楓 感受烏蛟騰鄉村氣息

聖誕節連續三日假期，最好就係約老友去行下山睇下紅葉。提起紅葉好多人都會諗起元朗大棠，但係我怕人多，所以今次選擇一個人比較少，可以慢慢行享受一下寧靜嘅鄉村地方 – 「烏蛟騰」。

去烏蛟騰有好多種方法，最快當然係大埔墟港鐵站坐小巴直接入去。但如果想行下山，就可以選擇由新娘潭出發，順道可以去欣賞新娘潭同照鏡潭瀑布景色。

由新娘潭自然徑入口出發，經過燒烤場，如果向左邊走可以遠望新娘潭瀑布。但今日我地打算去照鏡潭試下可唔可以用航拍機影瀑布，所以就略過新娘潭不走。沿梯級繼續往下走，然後先過橋，就會見到指向「照鏡潭」嘅石碑，然後只要行多10分鐘多就會見到照鏡潭瀑布。

用航拍機在照鏡潭瀑前嘅石澗試過幾個不同位置都定唔到位，加上經過上次新娘潭嘅經歷，大家都唔敢用ATTI模式起飛。最後決定放棄航拍，只用專業相機拍片。影完就原路返去橋嘅位置，然後往烏蛟騰方向走。

大約行15分鐘左右就差不多到烏蛟騰，瀑布嘅水流聲越來越大。原來烏蛟騰位置正是照鏡潭嘅上游，還有人開闢了一條山路通去瀑布頂嘅石澗。眼見瀑布頂部位置比較開揚，我地二話不說就走落去睇下航拍機可唔可以做到GPS定位。定位果然無問題，雖然起飛位置不算好，但起碼可以用GPS模式進行拍攝。拍攝完畢準備降落時，航拍機又突然轉為ATTI模式，機身受風向影響搖晃。好彩孫仔有經驗，再升高等再次接收GPS模式時再降落，最後有驚無險安全降落。

瀑布航拍片

影完瀑布，接回郊遊徑好快就到烏蛟騰村，順便在村口嘅士多食碗麵醫肚。老闆非常好客，還加料請我地食剛整好嘅冬菇，冬菇真係好鮮甜!

食飽飽就出發去九擔租，其實由烏蛟騰村去只係5分鐘路程，就會見到有一處特別紅嘅樹林(真係無可能睇唔到囉!)。

九擔租嘅紅葉雖然比大棠少，但係生長得非常茂盛，而且遊人比較少，我可以慢慢欣賞同隨意影相。今次計劃嘅行程好短，睇完紅葉就按計劃原路行返去新娘潭坐車離開。

觀看紅葉影片

後感︰

烏蛟騰一帶非常寧靜，充滿鄉村田園色彩。相比起大棠人來人往的熱鬧，我還是比較喜歡在這裡慢慢欣賞紅葉。楓香樹數量雖少，但在云云綠樹中卻非常顯眼，令我印象深刻。

郊遊日期︰2015年12月

隨行資訊

可參考下面地圖橙色前往烏蛟騰路線︰

路線︰新娘潭 → 照鏡潭 → 烏蛟騰 → 九擔租
難度︰2/10
全長︰1.6公里
隨行裝備︰相機、三腳架、替換衣服、小量乾糧及飲料
新娘潭交通︰大埔墟港鐵站乘坐20R小巴(每日)或275R巴士(星期日及假日)於新娘潭下車
烏蛟騰交通︰大埔墟港鐵站乘坐20R小巴(每日)於總站下車
詳細介紹︰

注意事項︰

• 照鏡潭溪澗石頭比較濕滑，切記要小心
• 潭水頗深，不建議在潭中游水
• 切勿污染水源，帶走所有帶來的垃圾，珍惜大自然
• 切勿採摘楓香樹葉當作留念

***根據香港郊野公園條例第11條，在郊野公園及特別地區操縱動力驅動的模型飛機屬違法，可被罰款2,000元及監禁三個月。航拍人士應注意安全，以免觸犯法例***