今個星期日打算同親朋戚友去泥涌燒烤場燒烤，所以諗住早一日踩單車入去泥涌探下路，順便去望一望燒烤場附近有咩設施。出發前查過天文台網站話今日會有一兩陣雨，能見度亦較低，所以我都無帶相機就輕裝出發。
先到大圍單車鋪租車，租車價錢比以前貴了很多，$80一日。孫仔就帶了GOPRO及單車支架準備拍第一套單車影片，試完車安裝完相機後便立即出發。
沿城門河踩，經過沙田馬場後過橋，到達馬鞍山海濱長廊稍作休息，並欣賞對岸慈山寺觀音像及八仙嶺的照景。
當時天氣越來越好，加上入馬鞍山的單車徑比較少人，沿途迎風而去，非常舒服。
好快就到達海濱長廊的盡頭，經過馬鞍山公園入烏溪沙沙灘尋找「海之心」。
初頭因為羊群心理，以為「海之心」在沙灘較人多的左邊，來回找了數次先發現竟然在沙灘的右邊。可能時間還早，沒有人前來影相，可以任我影。
因為今日無帶單反相機，所以隨意拍幾張相便繼續行程。先沿沙灘小徑穿過長徑村踩近入白石渡頭村，沿途經過獨木舟會，再由烏溪沙路出接西沙公路往泥涌巴士站。
欣賞完泥涌風景之後，由原路回巴士站，然後就去巴士站對面的泰式餐廳”西沙茶座” （價錢偏貴XD）嘆一個下午茶。
食飽飽就要回程踩回大圍還車喇~~~!!
觀看單車影片
再為大家送上兩套航拍片!
(1) 泥涌
(2) 烏溪沙海之心
後感︰
天文台的天氣預報再次失準，令我覺得好莫名其妙。馬鞍山海濱的單車路線比起去沿吐露港入大美督的路線少車，在海濱長廊一段尤其舒適。另外，當日於兩個小時內在西沙公路見到三宗交通意外，而翌日凌晨時間再有一宗私家車撞死牛隻的慘痛意外。我注意到西沙公路泥涌一段燈位較少，司機開車亦比較快，大家過馬路時要多加注意!
隨行資訊 
路線︰大圍 → 彭福公園 → 馬鞍山海濱 → 烏溪沙沙灘(海之心) → 泥涌
難度︰★★
全長︰約13公里 (單程)
需時︰1小時30分鐘 (不計休息、影相時間)
隨行裝備︰相機、充足水及乾糧、更換衣物
大圍交通︰乘港鐵到大圍站下車
租單車店鋪(近港鐵站)︰亞澳/澳運單車、東京城單車、新南華單車(價錢︰大概$60至$100一日)
試車時要注意︰
(1) 確保單車椅的高適合自己，確保雙腳容易落地，但座椅亦不宜太低，會導致踩單車時雙腳過度屈曲，會增加雙腳負擔。
(2) 必須確保選擇的單車剎車性能良好，注意剎車時必須先剎後輪，否則很易失重心。